Num 22 | KYC | STEP | Isaraele wambu dupwa paleyaminyi yuu doko yaki nyuo ipwa Jotane neta potemenge dorena ingyuo yuu Jereko paki siyamopa yuu Moape lama lama dokona komau anda pyuo paleyami.

Numbers 22

Moape Range Kiŋi Dokome Belame Epena Lao Kee Leya

1 Isaraele wambu dupwa paleyaminyi yuu doko yaki nyuo ipwa Jotane neta potemenge dorena ingyuo yuu Jereko paki siyamopa yuu Moape lama lama dokona komau anda pyuo paleyami. 2 Moapena kiŋi Sipona ikinyingi Beleke lenge dokome Isaraele wambu dupwame Amo wambu dupwa kando yulu mende piyaminyi doko soo 3 baamoo banya wambupi dupwa peparaeme Isaraele wambu dupwa ama soo kaeyo epo piyaminyisa kando pakayami. 4 Moape range wambu dupwame Mitiane range akali mupwa dupwa kando leyami. Mena bulamakao kalyuwame rambe akipi nenge kandale doko suu pyao wambu dae epelyaminyi dupwame oo repeta namwana bange dupwa peparae ukiaki minyuo kokwa serami. 5 Dokona lao kiŋi Belekeme wai minyingi akali lapome Beona ikinyingi Belame yuu Peto ipwa Yuporisa repeta yuu Amau dokona kareyamo doko epena lao lamaila pena leya. Wambu wai pii minyuo pao dopa leyami. Beleke nakama dopa langyuo, Yuu mendakinya wambu peparae Isipi yaki nyuo dae epo yuu dakena wakale wakale raeyo palipala namwana yuu dake nyelana letaminyi doko emba sipili yaka lao langilyu lapya, leyami. 6 Wambu dupwa ama malu mee namwa isa palyilyaminyi dokona emba waiya lao epo nambana lao nakama koo keta palyuo mende pyakape. Dopa piri ramo namwame kapa pyuo anamasi minyuo yuu dakena pyao ralinyi nembarama rapisi. Embame wambu dupwa elyape keta petena lapinyi dokopa elyape keta petaminyiko. Randa maiyuo koo keta pena lapinyi dokopa kooko keta pelyaminyi. Doko namba silyu.

7 Dokona lao Moape rangepe Mitiane rangepe akali mupwa dupwame Isaraele wambu dupwa randa maiyuo koo keta pena lara lao Belame kareyamo dokona papala kana mone maiyuo Belekena pii doko lamaiyuo piyami. 8 Piyaminyi dokopa Belameme nakama lamaiyuo lao, Epapu kukwa nembo dae palimanalese. Dopa pyuo palirama dokopa Kamongome namba pii langiramo dusipa rakya nambame nakama langiru. Dokona lao Moape range akali mupwa dusipa Belamemoo pipya paleyami. 9 Anatumi Belame kareyamo dokona epapala piso soo, Akali embamoo petaminyi dasipa apimoose? leya. 10 Baame isingi lao, Yuu Moape range kiŋi Beleke dokome pii langyala pena lapyasa imi. 11 Doko wambu lapo Isipi yaki nyuo dae epapala yuu dakena wakale wakale nyuo yoko lapala palaminyi lapya. Baame wambu dupwa pyao ralinyi nembaro lao nambame banya lao wambu dupwa randa maiyuo koo keta palyakape lapya, leya.

12 Anatumi Belame lamaiyuo, Akali dasipa pipya role pyao paa napipi. Nambame Isaraele wambu dupwa elyape keta pisingiŋi dokona randa maiya napipi.

13 Dokopa yangama Belame Belekena wai pii minyuo epeyaminyi akali dupwa lamaiyuo, Anda kapu kyuo pupwape. Kamongome namba nakama role pyao paa napipi letamo, leya. 14 Dokopa akali dusipa Beleke kareyamo dokona peyami. Papala dopa lamaiyuo, Namwa pipya role pyao epa naro lapya, leyami.

15 Dokopa Belekeme akali wambo pena leyamopape enakana konda pyuo akali kamongo dupwa pena leya. 16 Akali dupwa Belame kareyamo dokona papala Beleke pii leyamo dupwa lamaiyuo, Namba keta epa naroŋo lapala yulu mende wakale pii napipi. 17 Nambame emba kando yano pyao bange joo kamonganyi pyambuo embame langirinyili pyuo pyakao piru. Dokona wambu dapwa randa maiyakala ipupi lapya, leyami.

18 Dopa leyamopape Belameme isingi lao, Beleke baame namba kana kulingipi golope banya anda dokona singi dupwa peparae jeramopape namba Anatumi langilyamuli pyuo kamba laa naro ingilyamo. Kamame randa kuki laponape Kamongo nambana Anatunya pii kuki mende iki kapa isa pena lapala piru ingya nalyamo. 19 Dopa pipyamopape akali lapo dae paleyami dopale ingyuo nakama epapu kukwa dae palimanale. Dokona Kamongome namba pii lapo dupwana lao langilyape mee lao sero, leya.

20 Kukwa yuu gii dokopa Belame paleyamo dokona epapala Anatumi dopa lamaiyuo, Akali dusipame emba role pyao mona lao piso simi ramo doko panya rapa rapa pii. Dopa pirinyipape nambame langiru doko iki piri, leya. 21 Dokona lao yangama dokopa Belame sipurapala mena donge mende nyepala piso Moape akali kamongo dupwa pipya role pyao peyami.

Belamena Mena Donge Dokome Baa Pii Lamaiya

22 Belame banya mena donge matana piso banya kendemande akali lama pipya role pyao peyamisa Anatumi imbwaya. Imbwayamo dokona nakama panya peyaminyi dokona Kamongona aŋala mendeme kata roko kareya. 23 Dokopa aŋala dokome kata dokona wua gela minyaro kareyamo mena donge dokome kandapala panya peyamo kata doko yaki nyuo ee yuu dokona peya. Peyamo dokopa Belameme mena donge doko pyaroko pyapala kapu kyuo kata dokona lanyuo epeya. 24 Dokopa isa girapo ee paki paki pinya kata kuki sukusa siyamo dokona nemba nemba dolapona kana kame piru kareyamo kata dokona aŋala doko kareya. 25 Dokopa donge dokome aŋala doko kandapala pakao pupuli lao kata koteyamo dokopa kana kame dokona Belamena kimbu doko pyao pisiya. Pyao pisiyamo dokopa Belameme donge doko pyaroko piya. 26 Aŋala dokome dee mendasa papala kata paki pakipi parami kata see nayandena kata upi lao kareyamosa donge panya saka naya. 27 Dokopa donge dokome aŋala doko kandapala baa isa yuu dokona siya. Siyamosa Belameme imbwuapala banya pangali isa dokome donge doko pyaroko piya. 28 Piyamo dokopa Kamongo dokome donge doko pii lena lao maiyasa donge dokome Belame kando lamaiyuo lao, Nambame emba apa pipusi? Akipamo embame namba yuu rema pyalese? leya.

29 Leyamo dokopa Belame isingi lao, Embame namba kopyali inginyi nembalene dokona nambame emba pyalono. Nambana wua gela sipyali doko emba pyao kumakapuli, leya.

30 Mena donge dokome isingi lao, Emba wamba ene wane karo dokopa piso papyuo karo pao emelene donge dokoko namba daase? Wamba namba dapa pingi kandalese? leya. Leyamo dokopa Belame isingi lamaiyuo, Daa, leya.

31 Dokopa aŋala dokome wua gela minyaro kata dokona kareya doko Belameme kandena lao Kamongome lasaka piya. Lasaka piyamo doko kandapala Belame banya lenge kambu yuu dokona suu lapala pao paleya. 32 Pao paleyamo dokopa aŋala dokome pii poraiyuo lao piso soo, Akipamo embena mena donge doko yuu rema pyalese? Emba kata dake paa napenge ingyapyamo dokona emba kapa paa nareŋe lao nambame kata roko karo. 33 Dopa pipunu dokopa embena donge dokome namba kandapala yuu rema kapu kyuo panya pipya. Dopa pii napyali doko nambame emba pyao kumapala donge doko mee lete karena lapuli, leya. ^{▼▼Belamena arome pii doko. (Rombo 22-24)}

34 Belameme isingi lao, Namba yulu koo pyano. Embame namba paa nare lao kata roko karalene lao soo gisa nalono. Dopa pipunupape epapu embame namba kopetame pwuane lao suu pyare ramo doko namba kaepala kapu kyuo anda paro, leya.

35 Leyamopape aŋala dokome lao, Akali dasipa pipya role pyapeta pupwa. Dopa pyuo parenepape nambame emba laa lao langirunuli pyuo iki lape, leya. Leyamo dokopa Belame akali dusipa pipya role pyapeta peyami.

Belekeme Belame Yako Lao Nyiya

36 Belekeme Belame epelyamo leyaminyi doko sepala baa yuu taone andake kingi Aa lenge ipwa Anone repeta singi yuu Moape liti dokona kando nyela peya. 37 Belekeme Belame kando lao, Nambame emba keta wambo kanda soo pii peyono dokopa akipamo emba epa naese? Nambame emba kapa pyuo pee pii nare lao suu piisi? leya.

38 Belameme isingi lao, Namba epo wetapunupape nambana porai mendeme emba keta yulu pyakaronde daa. Anatumi langiramuli pyuo iki lakaro, leya. 39 Belame Beleke role pyao yuu taone Usote dokona peyambi. 40 Papala Belekeme mena bulamakaope sipisipipi pyapala minju dupwana lapo Belamemoo akali mupwa role peyaminyi dupwape maiya.

Belamena Poropeta Pii Pyongo Pyao Mupwa Leya

41 Dokopa yangama Belekeme Belame nyuo lanyuo yuu kyau Bamote Bealo lenge dokona pulyuo peyamo dokopa Belameme Isaraele wambu kareyaminyi dupwana lapo kapa kandara ingiya.